11:21 PM
Unknown
ក្រុមសិស្សសាលាបាល់ទាត់ជាតិដែលជាថ្នាលសម្រាប់ឈុតស៊ីហ្គេម ២០២៣ របស់កម្ពុជាដែលសំងំហ្វឹកហាត់នៅទីលានមជ្ឍមណ្ឌលកីឡាបាល់ទាត់ជាតិទន្លេរបាទី បានចេញដំណើរទៅប្រកួតក្នុងពានរង្វាន់ U14 ASEAN + Japan ដែលរៀបចំនៅប្រទេសជប៉ុនកាលពីថ្ងៃទី ៣០ មីនា កន្លងទៅ។
លោក កែវ សារ៉េត នាយកសាលាបាល់ទាត់ជាតិ បានប្រាប់ Sabay នៅព្រឹកនេះថា៖ “នេះជាលើកដំបូងហើយដែលក្មេងៗ បានចេញទៅបង្ហាញសមត្ថភាពនៅក្រៅប្រទេស ហើយក៏ជារឿងល្អ ដែលពួកគេបានទៅសិក្សាស្វែងយល់ពីបាល់ទាត់នៅប្រទេសរីកចំរើនដូចជាជប៉ុន”។
លោកនាយកមានការសោកស្ដាយជាខ្លាំងដែលខាងអ្នករៀបចំកម្មវិធីតម្រូវយកកីឡាករទៅប្រកួតតែចំនួន ១៧ នាក់ប៉ុណ្ណោះ ខណៈកីឡាករ ៣ នាក់ផ្សេងទៀតមិនបានទៅ។ លោកបានព្យាយាមសុំទៅខាងភាគីជប៉ុនដែរ ប៉ុន្តែម្ចាស់ផ្ទះមិនអនុញ្ញាត។ រាល់បន្ទុកក្នុងការចេញទៅប្រកួតលើកនេះគឺជាចំណាយរបស់ជប៉ុនទាំងស្រុង។
អត្ថបទពាក់ព័ន្ធ៖ ស្គាល់ឈុតអនាគត U23 កម្ពុជា សម្រាប់ស៊ីហ្គេម ២០២៣ ដល់កម្រិតណា?
តាមគម្រោងជប៉ុនរៀបចំពានរង្វាន់នេះឡើងគឺដើម្បីត្រៀមខ្លួនយុវជនជំនាន់ក្រោយរបស់ខ្លួន ធ្វើជាម្ចាស់ផ្ទះក្នុងព្រឹត្តិការណ៍កីឡាអូឡាំពិករដូវក្ដៅដែលប្រព្រឹត្តិទៅក្នុងក្រុមតូក្យូ នៅឆ្នាំ ២០២០ ខាងមុខ។
គ្រប់ក្រុមទាំងអស់ចេញដំណើរទៅប្រកួតនៅថ្ងៃទី ៣១ មីនា និង ថ្ងៃទី ៩ មេសា ទើបត្រឡប់មកវិញ។ ការប្រកួតធ្វើឡើងនៅតំបន់បាល់ទាត់ J-GREEN Sakai នៃទីក្រុង Osaka ចាប់ពីថ្ងៃទី ១ ដល់ ៦ មេសា៕
